رواية ارهقني الفجور الفصل الرابع 4 بقلم نوسه حمد

الشرطه جات المدرسه والغفير بقا يرجع في البنات والمديره ترجف وكل الاساتذه منهارين حسو بالخزلان لانو اسمها تربيه قبل التعليم بس للاسف في زمنا دا الاستاذ همو الاحرف الموجوده في المقرر وما عندهم علاقه بالتربيه انا لمن شفت الطفل يبكي وملفوف بي ملايه قلبي وجعني علي الطفل الما عندو ذنب والبنات منهارهات وضربات قلبهم كانت مسموعه المدرسه قفلت وقالو لينا الليله اجازه مشينا خلينا الاساتذه والشرطه في المدرسه حتي علا ما لاقيتا مشيت مرعوبه امي كالعاده منتظراني عشان احكي ليها اول يوم في المدرسه بس حست بي ملامحي متغيره سألتني ماقدرت ارد ارد اقول شنو اقول ليهم في بت عمرها ما يقل عن ال١٦ سنه ولدت في المدرسه ما معروف رده فعلهم ح تكون شنو بملابسي حقت المدرسه الدنيا صيف وسخانه تقتل رقدتا في السرير والبرده داخله جوه قلبي لمن برجف وفجاه جسمي عرق وحمه جاتني من وين ما عارفه امي بقت قاعده جنبي تعمل لي في مكمدات لمن ابوي جا لقاها جنبي لمن انخلع وجا جنبي بقا يقول لي ست البنات مالا قلت ليهو مصدعه مشا اتوضا وصلا وجاب مصحفو وقعد جنبي وبقا يقرأ لي في قران طبعا ابوي صوت تلاوتو يدخل القلب ومرات بقوم بي خطبه الجمعه وبقا خاتي يدو في راسي ويقرا ويحصن فيني وانا سرحانه فيهو وبفكر معقوله الولدت بالحرام دي ماعندها اب وام زيي معقوله انا اجي يوم واخزل ابوي انا مستحيل اعمل كده ممكن اخطئ بي لساني بس غلط ما يتمسح ما بعملو كل موقف بمر علي كنت بقارن نفسي بي العلطت ودي حاجه اكتشفتها لمن تلقي امك وابوك خايفين عليك ومحرصين عليك ومعلمنك الصاح والغلط مستحيل تغلطي بالساهل وحمدت الله ع نعمه الاستقرار الاسري الانحنا فيهو اخواني جو من المدرسه ابوي قال ليهم اختكم مصدعه العبو بره انا كنت دايخه عاوزه انوم وفعلا نومتا ما صحيت الا المساء قومتا لقيت ابوي وامي يتونسو اول ما جيت جنبهم قالو لي الصداع خفا قلت ليهم الحمد لله امي قالت لي ما حكيتي لي اول يوم عملتي شنو انا اتزكرت الموضوع قلبي بقا يدق ابوي قال ليها خليها ما تضغطي عليها امشي صلي يابتي وتعالي اكلي ليك لقمه واقعدي اتونسي معانا قلت ليهو حاضر

تاني يوم الصباح لبست وطالعه المدرسه لاقتني علا في وشي انا لمن رجعت منها لي ورا قالت لي مالك بسم الله حسيت انها عندها علاقه بالموضوع قلت ليها معليش يا علا خليني في حالي انا ما ناقصه واتسرعت مشيت قداما قالت لي ليه ما تكوني دي انتي الولدتي قبلت عليها قلت ليها بتعرفيني كويس وما تستفذيني بالكلام الولدت دي بتعرفيها كويس قالت لي وليه ما تكوني بتعرفيها انتي قلت ليها تقصدي شنو دي منو البعرفها انا قالت لي الشرطه ح تكشف الحقيقه بس ساعتها ما تنصدمي انا حيلي مات ياربي دي منو اتزكرت صفيه قلت معقوله تكون دي صفيه مستحيل صفيه تعمل كده صفيه بتخاف من ابوها موت مستحيل تغلط غلط زي دا قلت ليها علا انتي تقصدي صفيه قالت لي عاوزه تشتغلي محقق انتظري الشرطه تكشف الحقيقه ما تتعبي ما ح اوريك لو موتي ويلا سلام فاتت خلتني وانا حسيت بتقل في رجولي معقوله لا لا مستحيل انا ممكن اصدق في نفسي بس صفيه لا

وصلت المدرسه بقدره قادر ولسه الوضع فيهو توتر عجيب دخلت الفصل والحصه بدت صفيه سلمت علي سلام بارد وانا ما قادره اصبر الحصه تخلص عشان اسال صفيه بقيت اوسوس معاها قلت ليها صفيه ممكن سؤال وتجاوبي براحه عشان اقدر اساعدك قالت لي شنو قلت ليها انتي في زول لمسك بقت تتمتم قالت لي كيف ما فهمت حاولت تتهرب قلت ليها لا انتي فاهماني كويس ممكن تكوني دي أنتئ الولدتي في الحمامات المهجوره صفيه قالت لي انتي جنيتي وكيف تتهميني اتهام زي دا قلت ليها انا ما اتهمتك بس في تلميحات بتقول دي انتي وانا عاوزه اساعدك بصوت عالي قالت لي تساعديني فشنو انتي مجنونه انتي عاوزه تلفقيني تهمه انا ما عندي فيها اساس الاساتذه جات طقت لينا الدرج وصفيه بقت تقول قي كلام جزء قلتو وجزء كبير زادتو من راسها انا بعاين ليها بي استغراب صفيه زادت الكلام معناتا صفيه فعلا الطالبه الولدت الاستاذه طلعتني وودتني للمديره انا وصفيه وصفيه بقت تتبكا وتشكي فيني وتتهم فيني بحاجات انا لو ما واعيه ما بعملهن المديره قعدت تكورك فيني وتجلد فيني بكل قوتها وبدون رحمه كانو في جواها غل وعاوزه تفضيهو فيني لغايه ما استاذه منال جات وكل الاساتذه اتلمو فيني ومسكوها قالو ليها حرام تجلديها كده وهي كانت متوتره لمن عرقانه وبقت تقول ليهم الطالبه دي عاوزه تثبت الجريمه علي بنات مدرستي. والكلام دا ما حقيقي والشرطه اتحقتت من دا بي نفسها ولمت الموضوع هي منو عشان تتهم بت بالشكل دا وهسي اهلا لو اشتكوها ح تعمل شنو انا فوضي في المدرسه ما عايزه ودا اخر انزار ليك يا نسيبه ما اسمع اسمك تاني قلت ليها حاضر ورجعت الفصل ابكي صفيه طلبت تتحول مني وحولها من جنبي وجابو لي بت اسمها سعاد بت مسكينه ومحترمه شهاده عربيه قالت لي معليش غلبني ابادرها نفس شعورها كفايه صفيه الخزلتني انا متاكده انو في شي كبير بس ما عارفه هو شنو سعاد قالت لي نسيبه انتي زوله متفوقه مالك ومال القصص دي خلاص الشرطه لمت الموضوع قلت ليها كيف قالت لي م عارفه بس لمو الموضوع قلت ليها كده حرام فشي غلط قالت لي غلط ولا صاح انتي جيتي هنا عشان تتعلمي بطلي غشامه وركزي في قرايتك اركز كيف انا بقيت زاتي خايفه ع نفسي صفيه لو دي هي فعلا صفيه مسكينه ما عندها أمور البنات ديل سعاد قالت لي كلمه عمري ما انساها قالت لي ما تثقي الا في نفسك قلت ليها طيب

انتهي اليوم الدراسي وطلعت مشيت البيت المساء امي قالت لي علا جاتك بره والبت دي اعملي حسابك منها شديد قلت ليها حاضر يمه هي زاتا اتغيرت شديد قالت لي حتي لو اتغيرت ماتنسي اغلاطها وطبعها ما زي طبعنا نحنا ناس في حالنا كايسين الستره قلت ليها يمه ما تخافي علي انا عاقله ومشيت منها علا كانت شايله ليها كراس قالت لي عاوزه اكتب منك قلت ليها اتفضلي فضلتها ودخلت غرفتي انا واخواني غرفه صغيره من طين بس نظافه امي مدياها منظر مريح مشيت جبتا ليها مويه وامي جابت ليها عصير قلت ليها علا جات تكتب مني قالت لي كويس خلن بالكن في قرايتكن وفاتت لمن فاتت مني علا قالت لي المديره جلدك ليه قلت ليها انتي جيتي تكتبي ولا تساليني قالت لي الاتنين موش انتي عاوزه تعرفي الحقيقه قلت ليها ياتو حقيقه قالت لي الحاصل قلت ليها اها احكي قالت لي بحكي بس ع شرط الكلام دا لو اتوزع ح تكوني انتي النشرتيهو لانك متهوره قلت ليها انتي غبيه انا انشرو ليه قالت لي بس حزرتك قلت ليها طيب احكي قالت لي انا بحكي ليك الشفتو لغايه م مشيت قلت ليها اها قالت لي طبعا نحنا بقينا ندي الغفير قروش عشان اخلينا ندخل نشرب سجاير قلت ليها اها قالت لي اول يوم جينا فسحه الفطور قربت تخلص قلنا نمشي نشرب سجاره قبل الحصه مشت منار ادت الغفير قروش وقال لينا في زميله انظمت ليكم دخلت قدامكم قلنا ليهو زميله قال لينا اي دخلنا نشوف الزميله منو بس بره ما شوفنا زول قعدنا في مكانا البنقعد فيهو بعد مسافه سمعنا صوت طفل نحنا خوفنا وجرينا عشان الحمامات دي مسكونه طلعنا بس منار قالت الصوت دا حقيقي ود صوت طفل ومتاكده من كده وكنا خايفين ندخل بعد شويه جات صفيه طالعه انا قلبي بقا ادق قلت ليها وظاهر عليها شي قالت لي لا طبيعيه ونحنا جرينا عليها قلنا ليها سمعنا صوت طفل قالت لينا طفل شنو انا كنت بشرب في سجاير بس م صدقناها ومنار مشت كلمت الغفير والغفير مشا لقا الطفل وخاف يقول نحنا الكنا جوه لانو لو قال نحنا ح نقول هو بشيل مننا قروش والشي الحيرني الشرطه ليه لمت الموضوع معناتا في حاجه كبيره قلت ليها احتمال دا اكون استاذ علاء الغلط مع صفيه قالت لي ليه قلتي كده انتي شفتي عليهم شي قلت ليها ابدا بس حسيتا مايله ليهو قالت لي تتزكري لمن منار دقت صفيه منار بتحب استاذ علاء وبينهم علاقه من قبل ما يجي يدرس في المدرسه وعاوز يتزوجا قلت ليها انتو بتصدقو الاوهام دي كيف يعرسا كيف وريني وامها عرفت انكم بتشربوا سجاير قالت لي السجاير مالا حرام قلت ليها حرام اي الحلالا ليك منو قالت لي بلاش تلميح قلت ليها انتي حره انا مالي ومالك قالت لي خلاص نقفل الموضوع دا وخليني الخص منك اديتا كراسي وقعدت تلخص وطلعت مني متاخرة امي قالت لي قلبي ما مطمني البت دي جيتها دي ما ساي ما تشغلي بالي يا بتي قلت ليها يمه عليك الله ما تخافي انا واعيه جدا قالت لي طيب يابتي بس عايني لي انا وابوك محتاجين ليك امي مصره تخاف علي

تاني يوم مشيت المدرسه لاقتني منار في وشي قالت لي عاوزاك في موضوع قلت ليها خير قالت لي شفتي صفيه مع علاء عرفت علا عاوزه تعمل فتنه قلت ليها انا لا شفت صفيه لا غيرو وطلعوني من مشاكلكم دي انا لا شفت صفيه لا شفت غيرا وانا جيت هنا اقرا ما جيت اباري اخباركم انتو قالت لي كده يعني طيب يا نوسه ح اوريك

فجاه الكلام ملا المدرسه وكل بت تجي تسالني براها تقول لي صحي صفيه الولدت عرفت انو علا مشت قالت الكلام وقالت للناس انا القلتو اي زول سالني نفيت ليهو الكلام واتناقشت مع علا نكرت قالت لي انا خشمي مافتحتو

مرت الايام وصفيه بقت ما بتجي المدرسه لانو الكلام عنها كتر شديد تاني يوم وانا جايه المدرسه كانت في مره كبيره في السن وعندها عجز في رجلها حاولت اساعدها شكرتني وقالت لي دخليني غرفه المديره قلت ليها حاضر بقت تسالني انا بقرا في كم قلت ليها ثانيه قالت لي مع صفيه بتي عرفت انها ام صفيه قلت ليها انتي ام صفيه قالت لي اي بتعرفيها قلت ليها بعرفا شديد قالت لي طيب ما عارفه مكانا وين انخلعتا قلت ليها صفيه ما جات المدرسه ليها كم يوم. قالت لي صفيه اخر مره طلعت بلبس المدرسه وتاني ما جات وبقت تترجا فيني لو بعرف مكانا اوريها حلفت ليها اني ما بعرف عنها شي دخلت غرفه المديره وبالاتجاه التاني بقيت اتصنت فيهم المديره شاكلت ام صفيه وقالت ليها نحنا م مسؤولين عن اي طالب بعد نهايه اليوم الدراسي واليوم القالت امها طلعت فيهو المديره قالت صفيه كانت غياب والقصه اتعقدت اكتر مما معقده وياخوفي من الايام الجايه وربنا يستر ……يتبع