رواية عزاي انك رجاي العذب لو كل الدروب عثور الفصل السادس والخمسون 56 بقلم الكاتبة اديم الراشد

*(( #الحديقة_ست_وخمسون))*

*ــــــــــــــــــــــــــــــــــ*

#لطفا وليس امرا / لاتنسواااا متابعة صفحتي على الواتباد

#روايات _أديم_الراشد

.

.

قرب ضاري بفرح له وهو يساعده يجلس لكن حضنه بفرحه عظيمه وصلت لقلب عيسى

ومسح عيسى على ظهره : وش فيك ! وش جابك هالوقت

ابعد ضاري بفرحه وقال: ابشرك ان ربي رزقك بحفيد رزقك بسميك

عيسى بفرح:وشوووو وش قلت

ضحك ضاري : اليوم ولدت مضاوي وجابت ولد لو تشوفه يسحر الحين

ضحك عيسى بفرح: حمدلله ياربي حمدلله والف الف مبروك والحمدلله على سلامتهم

ضاري : لله يبارك فيه ويسلمك

عيسى : حمدلله ياربي ان انكتب لي اعيش هالفرحه الحمدلله

ضاري: الله يعطيك طول العمر وتشوف عيال عيالي

ابتسم عيسى: يارب ،لكن بطلبك طلب

ضاري : تم تم

عيسى: ابيك تجيبه لي

ضاري : وش ورايك تطلع معي للبيت وتكون عندهم ٢٤ ساعه

عيسى: لكن ادويتي

ضاري: انا اعطيك اياها انا طبيبك وممرضك واللي تبي بعد وانت بخير وتقدر تكون برا المستشفى

عيسى ابتسم : ابد والله ما اردك لو اموت على بابك

وقف ضاري يبوس راسه وكتفه وقال: انت نام الحين وانا برجع لهم وبكره نتفاهم

عيسى: الله معك

راح ضاري مبسوط وفرحان يحس انه فوق الغيم

_______________________.

ومن بكره الصبح

الكل عرف بولادة مضاوي والكل يركض ويستعد عشان يروحون لها في بيتها لانها بتطلع

ومع اذان العصر الكل كان موجود مع ام ضاري في بيتها ويساعدونها لاستقبال مضاوي و ولدها

مجلس ضاري مليان والكل ينتظر

وكل الناس في كفه وعقاب اللي يناظر خليفه بحضن خلف في كفه كان يتأمله وده يقوم ياخذه ويحضنه لكن يحاول يكافح نفسه ويبطل يتعلق فيه

حاول كثير وتصدد كثير لين وصل ضاري ووقفوا كلهم له واتجهوا لمضاوي وهم حولها واللي يفتح لها الباب واللي ياخذ اغراضها واللي يسندها والكل حولها ويضحك ويبارك

وضاري اللي حاضن ولده بكل حيله وهو يدور بين العيال يوريهم

والكل ملتم حوله كلٍ يضحك لكن عقاب اللي في قلبه غصه يتصدد لكن كل اللي يسويه يدعي في قلبه ان الله يفرح ضاري بولده ويعوضه هو العوض الصالح

ولف على صوت محمد يهمس ويقول : نصيحتي لك لا تعذب نفسك ، حنيت لخليفه قم واخذه احضنه واشبع منه ترا ماله ذنب كفايه عليه فقد ابوه لا تفقده عقاب اللي حل محل ابوه وانت ادرى ياعقاب بالفقد

التفت له عقاب بهدوء وفز من محله واتجهه لخلف وهو يجلس جنبه وناظره خلف ببتسامه عذبه وقال: اخيراً ياعقاب تعبت وانا انتظرك تكسر هالمكابر وتجي وتفهم ان خليفه ماله ذنب في مشكلتك مع وعد

اخذ عقاب خليفه وهو ييسلم عليه ويحضنه وكلٍ يناظره بهدوء وعقاب اللي هدت روحه على صوت سوالف خليفه

_______________________.

.

عند الحريم

كانت مضاوي تهول وتشرح اللي مرت فيه وتناظرها ليلى بخوف من شرحها المرعب

ام خلف : الله يهديك يا مضاوي احتسبي الاجر ولا تجزعين وتروعين بعض الناس

ضحكت ام ضاري : لا ماعليها ان شاء للله بسيطه

ام ناصر : ايه ندري ان كل شي بسيط لين يصير لمضاوي ووقتها يصير كبر طويق من كثر ما تهول فيه

وعد : والله انك جبتيها ياجده

مضاوي: افا يمه

ام ضاري : لا ماعليك يا ام ناصر جمعها الله مع ضاري بتسمعين عجب العجاب

مضاوي: وانتي بعد ياخالتي

ليلى : زين يسوون فيچ

مضاوي : اااه ياربي ليتني اصيدك يالچويتيه عشان تعرفين ان الله حق

ضحكت ليلى : ما عووووزچ

ابتدت السوالف بينهم تاخذ مجراها بينهم وقربت شهد بهدوء وهي تجلس جنب وعد

ولفت لها وعد مبتسمه وقالت: شهد وش فيك كأنك متضايقه

شهد: اي والله متضايقه حيل

وعد : بسم لله عليك وش فيك

شهد : ماني مرتاحه وانا بعيد عن بيت جدي وعقاب حابس عهد اللي صارت وحده ما اعرفها ابداً وعزوز دايم طالع مع فيصل وعقاب مكتئب اغلب وقته ومتضايق وجالس لحاله ما يكلم احد الا لين يجي احد من اصحابه وانا ضعت بالطوشه

تنهدت وعد بضيق وقالت: المفروض ماطلعتوا من بيت جدي وانتم عشتوا فيه من البدايه

شهد: ايه لكن مايصير نخلي عقاب لحاله وهو في ذا الوضع

وعد : وش فيه وضعه!! ما نشوفه الا بخير ولا نسمع عنه الا انه في احسن احواله

شهد: هذا للي ودك تسمعينه انتي ! وهذا اللي يبي عقاب الناس يسمعونه لكن فالحقيقه هو مو بخير ماعمري شفته كذا ابداً ، والله ياوعد عقاب فاقدكم فتقد خليفه وفاقد حتى حياته هي صح يومين لكن كل ما التفت له اشوفه يناظر الغرفه ونفسه متعلقه فيها

ضاقت وعد وهي تحاول ما تبين تأثرها وصدت.’: وش تبيني اسوي يا شهد حياتي مع عقاب انتهت وهذا هو خليفه موجود اذا يبي يشوفه وكلها ايام ويرجع اخوك على سابق عهده وكل شي بينحل المهمه الحين على ظهرك لازم تلمين شكل اخوانك وتصيرين قويه يا شهد لا تستلمين لضيق نصيحه مني

وقفت وعد وراحت تدور اي شي تسويه ولا تجلس تسمع هالكلام من شهد

_______________________.

وعند ضاري

اللي رجع لابوه وهو يجهزه عشان ياخذه مع لبيته وهو فرحان فيه وفرحان عيسى بعد والتفت على صوت صالح يقول : وين اخذه !؟؟ كان عقاب وخلف معه وهم ينتظرون ضاري اللي التفت بحده : وانت شعليك !!؟ صالح : الظاهر انهبلت، وين بتودي رجال مريض

ضاري : ان كان مريض فهو مريض بسببك ولا تفكر اني بخليه عندك دقيقه

صالح: عيسى ما انت طالع من هنا ابد

ضاري : وش بتسوي يعني!!

صالح: ابوك ادرى وش بسوي فيك

عقاب اللي كان يدور اي احد يطلع فيه غيضه وانفلت عليه بغضب وهو يضرب كتفه بكل قوته: قل وش بتسوي اذا انت رجال قل وش بتسوي

مسكه خلف : عقاب اهجد

عقاب اللي كان يتفلت عليه : انطق انطق

ضاري : عقاب اتركه ما يستاهل تعال ساعدني

عيسى : انا رايح مع ولدي لو تقلب الدنيا على راسي مارجعت

طلع صالح بغضب وطلع ضاري بأبوه وخلف وعقاب معه

وكل ما مروا بشارع كان عيسى يناظر بتأمل من زمان مااشاف الناس والشارع من زمان عن الحياه

وصلوا بيت ضاري والكل كان في استقبال عيسى والكل ينتظر بهدوء أبو ضاري اللي طلع فجأه

ساعده ضاري اللي مهتم فيه اهتمام كبييييير جلسواا بعد السلام

ودخل ضاري وهو ينادي: يمه يمه

ام ضاري : هلا يا يمه وش فيك

ضاري : يمه ابوي هنا وابيك تجيبين الولد ابيه يسلم عليه

ام ضاري: جبته هنا يا ضاري !؟ لو صار له شي

ضاري : لا مارح يصير له شي كذا هو بخير

ام ضاري : اللي تبيه يمه الحين اخلي مضاوي تجيب لك الولد اخاف اشيله واطيحه

ابتسم ضاري : زين

وقف ينتظر وبعد فترة جت له مضاوي واسرع لها: عطيني عنك

مضاوي : خذ

اخذ الولد وهو يمسح عليه بهدوء والتفت : انتي بخير

مضاوي: انا بخييييير وانااشوفك مبسوط وبخير

ضاري : اووه يامضاوي اوووه ياكثر ماني فرحان

مضاوي :لله يتمم عليك ياحبيبي

ضاري : امين .. يلا انا بروح لابوي

اخذ ولده وطلع لعيسى اللي ابتسم اول ماشاف ولد ضاري وجلس ضاري وهو يمده له وابتسم : خذ سميك يا جده

اخذه عيسى بيد ترجف كان يناظره بتأمل والكل يتأملهم

وقال ابو ناصر: اذن فيه اذنه يا ابو ضاري

رفعه ضاري وبدر عيسى يأذن في اذنه وهو يرتجف وصوته يرتجف من العبره وبعد ما انتهى باس ضاري راسه وهو يقول : ياجماعة الخير من اليوم ورايح بتنادوني ابو عيسى

ابو ناصر: الله يفرحك في عيسى يا ابو عيسى

ابو خلف : الله يجعله من الصالحين

محمد: الله يرزقك بره

الكل: امين

_______________________.

ومن هاليوم الحلو

كملت ايام ضاري الحلوه اللي كان كل يوم يصحى ويشوف ابوه وولده وامه ومضاوي يحس انه في جنه وماهو مصدق هالحياه الحلوه

وكانت مضاوي تسعى في انها تسعد ضاري وتطمن روحه كانت كل ماتشوفه مقبل تجلس فترات تتأمله بحب وكيف كانت بتخرب حياة هالانسان ***

وفي طرف خلف

اللي حياته اصلاً من يوم عرف ليلى وهي حلوه واللي كل يوم يشوفها يحمد ربه ان هالصدفه جمعتهم

وليلى اللي بنفس مشاعر خلف كانت مكمله مراحل حملها ***

ونادر وشوق اللي خلاص قفوا باب الايام الشينه وبدت مرحلتهم الحلوه في تربية عيالهم *** .

.

وفي بيت سحر وماجد كانوا مكملين في تفهمهم وماشيين في اسلوب الحب العذب الجميل

*** وفي بيت ابو خلف

ودعوا وحده من شموع بيتهم وتزوجت ندى ممدوح وقام لهم عرس جدد الحياه في نفوس الكل

وصفى بيت ابو خلف على حنان ووجدان ووعد وفيصل وغيث وسالم *** وفي بيت الجد قايد

اللي فضى من فترة اخذ عقاب اخوانه كان البيت فاضي يسكنه ابو ناصر وام ناصر ومحمد اللي اغلب ايامه مسافر

ومضاوي في بيتها وهيا بعد في بيتها ***

وفي طرف اماني وجابر

اللي كل خطواتهم مع بعض كانوا يستعدون لنقله كبيره في حياتهم منتظره من زمان وكانوا يحيطونها بحبهم العذب *** وفي اخر المراحل

كان هناك عقاب اللي ابد مابدت له حياته على مايبي واللي انقلبت في موازينه في شهور بسيطه كان يتوقع انه اكبر من هاللي يصير وانه كل ما تقدمت الايام بيصير اقوى لكن انصدم مع كل ساعه يضعف مع مرور الوقت يحتر صدره اكثر من قبل وبدت تذوبرفي قلبه امور كثيره

كان يظن انه قوي لكن اكتشف انه هش كثييييير ومستند على صفات قديمه داخله قبل تدخل وعد حياته وتهزها

وماكان هو لحاله ملاحظ لا الكل شايف وبدت مرحله الرجوع عند عقاب اللي صار يحاول انه يرجع وعد ولكن ماكانت ترضى وبدا يدخل واسطات لكن مافاد وبعدها بدت مرحلة اليأس والانهيار عنده *** ومن طرف وعد

اللي على كثر ما حلفت وقطعت على نفسها وعود انها تهد عقاب وقدرت تهده وشافت بعينها يمينها وقسمها تنفذ كان المفروض تنبسط لكن للاسف في داخلها ضيق ما دمحته هالشهور ابد

وبدت تتيقن ان عقاب فعلاً بيصير عقوبه ملازمتها في حياتها ماتقدر تبعدها ابد

وخصوصاً ان خليفه تعلق اكثر في عقاب وخرج الموضوع عن السيطره

ومع ذلك كانت مصره ما تخضع ولا تعيد الغلطه وترجع مع عقاب

_______________________.

وبعد ٨ شهور

مر فيها اللي مر من ايام وليالي حلوه ومتعبه

نبتدي بها من بيت خلف

اللي كان من ايامه السعيده ان يطلع مع ليلى لسطح وتدق ليلى العود وهو يغني لها

وفي عز اندماجهم كانت ليلى تردد مع صوت خلف (أنا وأنتي وبس

أنا وأنتي ومامعنا أحد

ولاغابت البسمه من ليالينا أبد

يدك في يديني والنظره في عيني

مدى ماله مدى،لك أنتي وبس

ودي نجوم الليل ماتسهر أبد

إلامعاك إنتي وبس

ولايظهر في الليالي قمر

ولايحلئ للحبايب سهر

إلا لنا أنا وأنتي وبس ومامعنا أحد )

وقبل يختمون اغنيتهم ابعدت ليلى العود وهي تضحك :خلف شووف

فز خلف وهو يناظر بطنها اللي يتحرك ضحك واخذت ليلى يده وهي تحطها على مكان حركة الطفل وضحك خلف اكثر

ليلى: قاعد يذكرنا إنه موجود ماصرنا انا وانت وبس

نزل خلف يبوس بطنها بضحك: ابد انت شرف وابشر بنغني لك اللي تبي

ضحكت ليلى وهي تناظر : يارب تجي بنت قول يارب ياخلف

خلف : يارب

ليلى: لايكون تبي ولد

ضحك خلف : مايفرق معي بس أميل انها تكون بنت لاني عندي ولاء للبنات ومتيقن انهم شمعت البيت

ليلى : صدقت والله

خلف : يلا يلا خلينا ننام عشان ترتاحين انتي من الصبح صاحيه

ليلى : يلا

وقف خلف يساعدها وهو يحن عليها من تعب هالحمل اخر الايام

مد ذراعه وهو يحاوطها وابتسم وهو يقول : الله ياليلى قبل فتره كنت اتشفق على شوفتك كانت اظن اني بموت ماشفتك

كنت اظن ان عثراتي في دروب حبك ما تنتهي كنت اظن اني بجلس احلم بوصلك لين اموت

ياما كبر ظني الخايف ولكن (كان عزاي إنك رجاي العذب لو كل الدروب عثور )

والحمدلله جمعني ربي فيك وامتلى صدري بحبك واكتفيت وهذاني انتظر قطعة منك تملى حياتي

اعتدلت ليلى بصعوبة وهي تحضنه وابعدت تناظره بعيون هيمانه : تدري انك اعظم دعوة حلوه صابتني خلف انا ممنونه للحظه اللي جمعتني فيك والصدفه للي جابتك لي وانا مستعده اضحي بكل شي وتكون مبسوط ومرتاح انا لو افكر مليون سنه شنو سويت عشان الله يرزقني بأطيب قلب صدقني مارح اقدر اقارنك بأي نعمه ثانيه

والله اني كل ما افتح عيوني ادعي ان الله يخليك لي ولا يذوقني حزنك

حضنها خلف بحب وهو خلااااااص وصل اقصى مراحل الحب والعذوبه مع ليلى

_______________________.

وفي بيت نادر

كان نوم الليل مودعهم من فتره وهم متقاسمين العناء

وواقف هو بولده محمد وواقفه شوق بولدهم احمد

وهم يتقاطعون الطريق وهم يهزون فيهم واخيراً بعد جهد ناموا وقربوا ينزلونهم بهدوء وبعدها ارتموا بتعب بجنب بعض مهلوكييييين

شوق : ياربي متى يكبرون تعبت والله

ابتسم نادر وهو يلتفت ويحضنها : والله انا اشوف انهم كل ماكبروا كبر همهم وكل ماكبروا نسينا انفسنا معهم

ناظرته شوق ببتسامه : والله صدقت نسينا الدنيا معهم

مد يده نادر بشويش وهو يشبكها بيدها وقربها ويبوسها واخذ نفس : كل ماقلت انتهى شي نبتدي بشي جديد لكن في كل هاللي يصير اشوف أنها تقربنا حتى لو ابعدنا وكل مره اتذكر الايام الصعبه في حياتي احمد ربي انك كنتي معي وكنتي رجاي العذب اللي ينسيني تعب الدروب وعثراته .

.

#كنتي معي وكنتي رجاي العذب اللي ينسيني تعب الدروب وعثراته

شوق : اذا انت تقول هالكلام انا وش اقول يا نادر ! قلي انا كيف ارد جميلك وانت اللي عطيتني الامان والحب الطمأنينه وانت اللي حنيت علي اكثر من امي وابوي وانت اللي اخذتني لبر الامان في كل مره اتعب اول اضيع

انا مدري كيف اجازيك والله اني مدري

ابتسم نادر وهو يحضنها: مابي جزاء الا انك تكونين معي بس وتضحكين وتضحك الدنيا معك

استكنت شوق بحب وهي تدعي ان الله يقدرها وترد الجميل

_______________________.

وفي بيت ضاري

بعد ماعطى ابوه ادويته وتطمن عليه طلع وسكر الباب واتجهه لغرفة امه وهو يشوفها تلف سجادتها بعد ما صلت الوتر

قرب وهو يبوس راسها: تقبل الله ياجنة الدنيا

ام ضاري: منا ومنك ياحبيبي ، هاه عساه ابوك نام

ضاري : حمدلله اخذ ادويته ونام وبالقوه ليين ابعدته هو عيسى عن بعض

ضحكت ام ضاري : لا تلومه يا يمه عيسى ماينمل منه

ضاري : اي وللله المهم يا الغاليه جيت اشوفك تبين شي عندك شي

ام ضاري: لا يا يمه بحط راسي وانا الحين انت روح ارتاح

ضاري : ابشري يلا نوم العوافي

ام ضاري : الله يعافيك

طلع ضاري وسكر الباب وهو يمشي من بين الغرف ويفيض قلبه حب وسعاده ورضا اتجهه لغرفته وفتحها وهو يشوف مضاوي تتسحب بهدوء من جنب عيسى الصغير عشان ياحس عليها ويقوم

بس فزت برعب اول ماحست بيدين ضاري تحاوط خصرها وهمست : فجعتني الله يصلحك

ابتسم ضاري : اشوفه ماقصر ولدي

مضاوي : اااه ياربي بغيت اموت لين نام

ضحك ضاري : اووه مابغيت اخذه من ابوي

مضاوي: تحالفوا ضدنا والله

ضاري : ماعلينا المهم

مضاوي: وشو!

ضاري بهمس : اشتقت لك والله

ضحكت مضاوي بخجل : امم اقدر اقول انا اكثر

ضاري : لا ابداً ولا يمديك نهائياً .. لاني دايماً بكون احبك اكثر ومشتاق لك اكثر وبكون في كل شي اعظم واكثر .. تدرين ليه!!

مضاوي : ليه!

ضاري : لاني لازم ارد لك شوي من هالشعور اللي تخليني اعيشه انتي كل يوم تخليني اشيل معروفك اكثر واشوف اني لازم اكون رجل يليق بك

انتي خليتيني اعيش كثييير امور كنت احسها حلو ومستحيل تصير انت عزاي في كل أمر كسر ظهري انتي رجاي العذب اذا تقطعت بي السُبل وتعبت انتي الامان اذا ارهقتني عثور الدروب

انتي كنتي نقطة تحول في حياتي مستحيل اكون بدونها

مضاوي : تدري اني اندم كثير ياضاري تدري اني احط راسي على هالمخده ولا اقدر انام ! اخاف اني مر هاليوم وضايقتك ولا زعلتك ولا حتى ما لبيت لك اللي تبيه اخاف في خاطرك شي اما مافهمته اخاف تبي شي ولا سويته اخاف كثيير اني اقصر معك وانت اللي معيشني فوق السحاب اندم اني في يوم من الايام كنت بضيعك من يديني اندم على كل لحظة مرت ولا قلت لك وش كثر احبك اندم على كل لحظه تمر وانا ماشفتك تضحك ممبسوط

ابتسم ضاري بتعب وهو ياخذ نفس وقال: عمرك شفتي احد يتعب من السعاده ! والله اني صار قلبي يوجعني من كثر ماني مبسوط وفرحان وعمرك لا تحسين انك مقصره الا في شي واحد اذا مرت دقيقه ماضحكتني قولي انك مقصره

قربت مضاوي تحضنه ببتسامه وهي تحمد ربها على هالنعيم اللي تعيشه

_______________________.

وفي بيت جابر

اللي كعادتهم بعد ما تعشووا وروقوا وانبسطوا راح للمكتب وصار يرتب اموره عشان يروح للكويت هالفتره ورفع راسه مستغرب وقوف اماني اللي ماتجي في المكتب وهو يشتغل

نزل الاوراق وهو يقول: اماني حبيبتي شنو فيچ!

قربت اماني ببتسامه ووققت: ابد اشتقت لك

ضحك جابر ووقف يحط يده على جبينها : بسم لله عليچ ، شنو صاير

اماني : شفتك طولت بالمكتب وانا زهقت قلت اجي

جابر: افاااا زهقتي اقفل المكتب وابو المكتب بعد ولل يضيق صدرچ يابعد طوايفي والله

ضحكت اماني : طيب خلص واناجهزت القهوه هناك وانتظرك

جابر: يلا

جمع جابر اغراضه على طرف وطلع يدور اماني اتجهه للغرفه وجلس: شنو تسوين

تقدمت اماني وهي وراها علبه ومدتها ببتسامه وقالت: جبت لك هديه

جابر :الله الله شنو هذا

اماني: افتحها وشوف

اعتدل جابر وفتحها ببتسامه لكن استغرب انها ورقه ! طلعها واول مابدا يقراها انصدم وفز يناظرها مصدوم

وقرب : اماني صچ هالمكتوب

ابتسمت اماني : ايه الحمدلله بعد تعب كتب ربي لنا نرزق بطفل

شهق بفرحه وهو يحضنها ماكان مصدق ابد وهو طال انتظاره واخيراً سمع هالخبر اخيييراً

ضحك بفرح وهو يناظر الورقه للمره المليون ضحكت اماني وهي تناظر فرحته العظيمه

ابعد يناظرها وقال: ابشر امي وابوي الحين ولا انطر باچر

ابتسمت اماني: تأخر الوقت الليله خله بكره اذا شفتهم بشرهم

جابر: اي والله تعالي تعالي قعدي قعدي

جلست اماني وهي تحمد ربها مليوون مره

_______________________.

وعند ماجد وسحر

اللي من بعد مابدت الاجازه قررت سحر تحمل رغم ان ماجد كان يبيها تنهي دراستها قبل لكن سحر ماحبت انها تحرمه فرحته بطفل وهو اللي اسعدها طول هالشهور وفعلاً حملت وكانت في شهرها الثالث في عز ايام الوحم المتعبه

وزي ماكان متوقع كان ماجد مثل النسمه يظللها بحب ولا يبيها تتعب ابد وعاذرها

كانت سحر مجرد مايدخل الليب تنام بدون ماتحس على نفسها ينقضي ليلها وهي نايمه بعمق ما تحس بشي حولها

وفي هالوقت التفت ماجد يناظرها وهي تقاوم ما تنام وتسهر معه لكن غلبها نومه ونامت على كتفه قبل لا تنتهي مقدمة الفيلم حتى ابتسم بحنيه واعتدل وهو يبعدها بشويش واخذها لسرير عشان تنام براحه وسكر كل الانوار ورجع لفيلمه اللي تعود يشوفه لحاله لكن ةل هالتعب على قلبه مثل العسل طالما ان سحر فرحانه ومبسوطه

_______________________.

وفي بيت ندى وممدوح

اللي دوبهم في بدايات حياتهم اللي كانت ندى تسعى انها تجملها قد ماتقدر

انتهت من العشاء الرومانسي اللي قررت تسويه ورتبت نفسها وتعطرت وجلست تنتظر ممدوح اللي رجع ببتسامه الهاديه فتح الباب ووقفت ندى : يا اهلاً يا اهلاً

ممدوح : يا هلا فييييك ياشمعة البيت

ابتسمت ندى واتجهت له وهي تاخذ اغراضه من يده : عساك ماتعبت

ممدوح : والله لو الدنيا واهلها فوق ظهري ما تعبت وانا أشوف هالوجهه الرضي يستقبلني

ابتسمت ندى بحرج : طيب يلا عشان تبدل وتتعشى

ممدوح : يلا

كان ممدوح راضي كل الرضا عن هالزواج وكان متوقع انه بيحصل مثل هالرضا ما دامه اخذ اخت خلف اللي يجسد كل معاني الرضا والسماحه

_______________________.

وفي بيت عقاب

دخل بعد ماجاء من دوامه وهو اصلا نسى حياته بين دوام وهالبيت رمى مفتاحه على جنب ودخل وهو يسحب نفسه وكالعاده مايمر من غرفة وعد مرور الكرام واخر الايام صار ينام فيها

التفت قبل يدخل على صوت شهد : عقاب جيت

عقاب: ايه

شهد : طيب تعال سويت لك عشاء

عقاب : لا مابي مالي نفس

اتجهت له شهد وهي تمسك يده : عشاني ياعقاب الله يخليك لا تضيع تعبي

ناظرها بضيق والتفت : زين هاتيه

جلس بتعب وركضت تحضر له الاكل وجاء عزوز: عقاب

عقاب : هلا

عزوز : اسمع ودي اقولك شغله

عقاب : وشو !؟ عزوز: ودي نرجع عند جدي اليوم متضايق حيل ويقول البيت فضى عليه هو وجدتي وعهد هذا هي تابت وعقلت وماعاد تعيد اللي سوته

تنهدت عقاب بهدوء: سو اللي تبيه يا عزوز تبي تجلس تبي تروح براحتك

عزوز: وعهد وشهد

عقاب : خذهم معك

عزوز: وانت

عقاب: انا بجلس في بيتي

عزوز: تجلس وانت هذا حالك

عقاب : وش فيه حالي طيب وبخير وايام وبتزوج

عزوز: والله

عقاب : ايه ليه وش ناقصني

عزوز: ابد ماينقصك شي وهذا عين العقل

جت شهد وهي تناظره بذهول ونزلت الاكل : صدق بتزوج

عقاب : ايه بتزوج

سكتوا كلهم مستغربين قراره بس كان عقاب لازم يقوله عشان يحسون انه بخير

اكل بهدوء ورجع للغرفه ولفت شهد: صادق ذا

عزوز: يارب يكون صادق عشان يعيش ويفتك

شهد : ووعد

عزوز: وعد ما تبيه وش فيك مافهمتي للحين

صدت شهد بضيق وهي ضيقها قطرة من بحر ضيق عقاب اللي جلس بهدوء وهو كل ماتطري وعد ياخذ نفس موجع

وانسدح بعد مافتح الراديو على الاغنيه اللي استوطنته اخر فتره (طاري وعد .. يشدني .. طاري وعد

نسمة خريف .. صوت الظلام

وخوفي بعد .. يشدني

طاري وعد .. بين الكلام .. ‏

و اتحدثوا عن اثنين .. مدري متى او وين

اتواعدوا .. واتباعدوا..‏ واحس بك كثر السما

لا جفت عروقي ضما

صوت الرعد يهزني ..‏ و طاري وعد .. بين الكلام .. ‏

يا غايبه ما تسمعين .. قالوا الهوى في كلمتين

اتواعدوا .. واتباعدوا ‏

و اللي انجرح .. الله يعين و يساعدوا

ضيع وعد .. وباقي وعد بين الكلام ‏ )

كان متيقن انه فعلاً ضيع وعد

_______________________.

وفي بيت ابو خلف

انتهت وعد من ترتيب بيت اهلها وطلعت لسطح جلست لحالها والكل نايم ناظرت سطح جدها اللي صار فاضي والباب مفتوح ما تسكر من اللحظه اللي راحوا فيه عيال نايف منه .. هالباب اللي كان لازم يتسكر ويتقفل زيييين عشان عقاب اللي ينام بالسطح

وسكتت فتره على طاري عقاب اللي ماتدري عنه من شهور واذا سمعت خبر تسمع انه عايش وبس تتذكر واسطاتهم انها ترجع بس فيه شي بقلبها كبير ما تقدر تتجاوزه وترجع ولا تحله

كانت في حيره من وضع عقاب لكن في حيرة اكبر من نفسها شلون في الوقت اللي لازم تحيي نفسها وتحيي قوتها صارت تدور الهدوء عشان تفكر في عقاب!! _______________________.

ومن بكره في بيت خلف

فز على صراخ مرعب حوله والتفت على صوت ليلى اللي تبكي وهي تقول : خلف قوم

اعتدل بخوف : وش فيك وش فيك

ليلى : بولد بوووولد

ارتبك خلف وفز مايدري وش يسوي لكن اول اتجاهه لثوبع لبسه ورجع لها : يلا يلا

اخذها لسياره وهو كل مايسمعها تبكي او تصرخ ينهبل مايدري كيف يسوي لكن وقف عند باب بيت ابوه وركض يدق الباب

وفتح فيصل : خلف وش فيك

خلف : امي امي وين

فيصل : جوا

ركض لها وهو يناديها : يمه يمه

فزوا كلهم : خلف وش فيك

خلف : ألحقي يمه ليلى تولد

ام خلف : طيب طيب

ركضت وجدان تجيب اغراضها ورجعت وهي تعطيها واخذها خلف وطلع وعلى طلعته صدف اماني وجابر

جابر: خلف شنو فيك!؟ خلف : ليلى تولد

جابر: شنو ووينها!؟ خلف : بالسياره

جابر: يلا يلا بسرعه ألحق يلا

طلع خلف مسرع ولحقه جابر ونسى سفره للكويت ووقف مع خلف يتنظر ليلى تولد

_______________________.

وفي السوق

جاء ضاري مبتسم لدكان الجد قايد بس ماشاف خلف لكن التفت على جيت نادر وعقاب في نفس الوقت

ضاري : شرفتوا ياباشوات

نادر: وين الباشا ٤

ضاري : مدري ما لقيته فالمحل ماشفتوه فالطريق

عقاب : لا لكن مامريت بيته ولا بيت جدي

نادر:وانا مريت من ساحة المسجد ولا شفته هناك

ضاري : غريبه

عقاب : ابد ماغريب الا الشيطان بما ان زوجته على وجه ولادة تلقاه عندها مايقدر يخليها

ضاري : في هاذي صدقت

نادر: اجل يلا شوفوا لنا مكان نفطر فيه

ضاري : ايييه وبنكثر الفطور بعض الناس صاير هيكل عظمي

ناظره عقاب بطرف عين : ضاري مالي خلق اتهاوش معك

نادر : لااااا مودع الملاعب طالما انه مايبي هواش

عقاب : امشوا بس امشوا

طلعوا متجهين لمكانهم بعد ما اخذوا فطورهم

_______________________.

وفي بيت الجد قايد

رجع عزوز وشهد وعهد

وفزت ام ناصر تهلي بهم والتفت محمد ببتسامه: اخيراً نورتوا البيت

عزوز : ايه رجعت لنا الحياه

ابو ناصر : بيتكم ومحلكم يا حبايبي

محمد : ووينه اخوكم الردي

شهد:عقاب عنده شغل بيجي شوي

ام ناصر : تعالوا تعالوا افطروا توها حنان مسويه الفطور

جلسوا والكل يسىلف ماعدا عهد اللي في صمت غريب عليها وهي اللي خلاص فهمت انها لو تنقلب الدنيا ماتقدر تضر عيال عمها وعقاب وراها

وبعد الفطور بدا الجد ينادي بيت ابو خلف للقهوه بعد ماعزوز راح ودخل ابو خلف وهو متوتر

ام ناصر: وش فيك

ابو خلف: ابد خلف اخذ زوجته للمستشفى تولد وللحين ماجاء خبر

ابو ناصر: والله الله يرزقه الذريه الصالحه

الكل : امين

محمد : ومادق

ابو خلف : ننتظر للحين

ام وعد : بسيطه ان شاء الله ادعوا الله بالتييسر بس

الكل: الله يسهل عليها

محمد : يلا اجل انا بروح للمحل الجد : كلنا بنروح قم ياناصر لا تقعد تفكر

ابو خلف : يلا يلا

طلعوا الرجال وجلسوا البنات يخمنون وش بتجيب ليلى

ووقفت وعد تجدد القهوه ورجعت وهي تسمع اماني تقول : غريبه رجعتوا يا شهد ماتقولين عقاب بياخذكم على طول

شهد: ابد عزوز ما تحمل يبعد عن جدي وجدتي اكثر وغير ذا عقاب بيتزوج واكيد مارح نجلس ونضايقه

حنان : بيتزوج!!! شهد: ايه

اماني : غريبه!

شهد: ليه ؟! اماني : يعني احسه صاد عن الزواج هالفتره

شهد : وش يسوي اذا جلس كذا بيموت

وجدان: بسم لله ليه ؟ .

.